Ævintýralegur leiðangur sjálfsþekkingar

hefst 2025

10 dagar í fallegu umhverfi

5 helgar í Yogavin

Dagsetningar væntanlegar

Skráning og nánari upplýsingar

Kennarar

Ásta Arnardóttir

Ásta er aðalkennari í náminu og hefur kennt yoga frá 1999. Hún opnaði Yogavin 2014 og kennir vinyasa, yin yoga, möntrur, tónheilun, yoga nidra og ýmis námskeið. Hún hefur kennt og þróað yogakennaranámið frá 2010 og útskrifað á annað hundrað yogakennara. Ásta er leikkona, leiðsögukona og yogakennari að mennt og hefur fjölbreytta reynslu af iðkun og kennslu. Hún er einn af stofnendum Félags um vipassana hugleiðslu og hefur kennt og leitt kyrrðarvökur á vegum félagsins frá 2011. Sjá nánar um Ástu

Kolbrún Björnsdóttir

Kolbrún er grasalæknir og eigandi Jurtaapóteksins. Hún útskrifaðist úr grasalæknaskólanum í Bretlandi árið 1993 og hefur starfað við grasalækningar síðan og hjálpað þúsundum til bættrar heilsu. Kolbrún hefur kennt í yogakennaranáminu í Yogavin frá 2015. Hún kennir anatomiu innri líffæranna með áherslu á meltingarveginn. Samkvæmt yogafræðunum og náttúrulækningunum er melting undirstaða góðrar heilsu og tekur ekki bara til meltingar fæðu heldur að melta reynslu sína á meðvitaðan hátt. Kolbrún miðlar af áralangri reynslu sinni hvernig koma má starfsemi meltingar í lag til frambúðar. Sjá nánar um Kolbrún Jurtaapotekið

Rakel Dögg Sigurgeirsdóttir

Rakel Dögg er sjúkraþjálfari, nuddari, flotþerapisti og yogakennari. Hún hefur kennt í yogakennaranáminu í Yogavin frá 2013. Hún kennir anatomiu stoðkerfisins með tilliti til yogakennslu og hefur þróað frábæra leið að miðla undraveröld stoðkerfisins og hreyfifræði líkamans til nemenda. Hún hefur brennandi áhuga á líkamanum og virkni hans og miðlar reynslu sinni að hjálpa fólki að endurheimta líkamsfærni, styrk og liðleika.

Námslýsing

Námið hefst á 10 dögum í Skálholtsbúðum.

Dásamlegur og djúpur tími yogaiðkunar í fallegu umhverfi. Markmið þessa áfanga er að efla þekkingu á yogafræðunum og dýpka yogaiðkunina með landakort yogafræðanna að leiðarljósi. Dagleg iðkun vinyasa, yin yoga, yoga nidra, pranayama, hugleiðsla, möntrur, möntrusöngur, dans og yoga úti í náttúrunni. Gómsætt grænmetisfæði, dagleg iðkun og nærandi samvera styður við iðkun hvers og eins í kærleika, hlustun og leikgleði.

Námsefni:

Yamas / Niyamas
Asana
Pranayama
Pratyahara
Dharana
Dyhana
Samadhi
Yogasutra Patanjali
Bhagavad Gita
Jnana / Bhakti / Karma
Purusha / Prakriti / Gunur
Kosha / Maya / Moksha
Chakra / Nadis / Orkufræðin
Buddha / Dharma / Sangha
Brahma Vihara
Vinyasa
Yin yoga
Yoga nidra

Námið gefur glögga innsýn í yogaheimspekina og hvernig hún nýtist í daglegu lífi. Yogasutra Patanjali og Bhagavad Gita eru lagðar til grundvallar og nemendur fá tækifæri að sannreyna markvissa leiðsögn þeirra og uppgötva viskuna hið innra.

Með daglegri og fjölbreyttri iðkun yoga og hugleiðslu fá nemendur stuðning til að stunda jákvæða og heiðarlega sjálfsskoðun. Meðvituð hlustun á líkama, tilfinningar, huga og orkusvið gefur næma líkamsvitund, sjálfstraust og samkennd. Í yogabúðum gefst næði til að fá beina reynslu af því hvernig yogaiðkun skapar jafnvægi, eflir meðvitund og sköpunarorku í daglegu lífi.

Farið er ítarlega í klassíska uppbyggingu á asana og pranayama ásamt því að kanna náttúrulega hreyfimöguleika líkamans og hreyfifræði samtímans. Markmiðið er að hver og einn finni sína leið í skapandi yogaiðkun. Fjallað um áhrif asana á grunnkerfi líkamans. Einnig gerð grein fyrir hvernig aðlaga má æfingar að líkamlegu atgerfi hvers og eins. Nemendur fá námsgögn sem sýna vel uppbyggingu asana.

Kenndar möntrur, vedisk kyrjun á möntrum og kirtan möntrusöngur.

Fjallað um anatomiu huga og fíngerðari orkulíkamans. Frætt um orkubrautir, orkustöðvar og samskipti. Nemendur fá innsýn í grunntækni hugleiðslu og tækifæri til að iðka núvitund hugleiðslu á kyrrðardögum.

Farið er í grunnþætti heilsufræðanna, hvernig skapa má heilbrigði og jafnvægi með mataræði, hreyfingu, hugleiðslu og meðvituðum lífsstíl.

Jákvæð og skapandi nálgun er lögð til grundvallar og hvatt til skýrleika, umburðarlyndis, hjartagæsku og leikgleði.

Umsögn nemenda um þennan áfanga:

Í Skálholti beið okkar vel og þétt skipuð dagskrá þar sem langir júnídagar voru nýttir til fulls. Flæði til mikillar fyrirmyndar, úthugsað prógram og traustvekjandi og örugg umgjörð þar sem gætt var að minnstu smáatriðum. Kennari gaf sig alla í kennsluna og miklu meira en það. Það var einstök upplifun að vera nemandi og fólst lærdómur Skálholtsdaganna ekki síst í að vera vitni að virðingu kennarans fyrir fræðunum, iðkuninni, nemendunum og náttúrunni allt um kring. Upplifun af kennslunni í Skálholtsbúðum er lærdómsríkt leiðarljós í lífinu.

Ingibjörg Valgeirsdóttir yogakennari og framkvæmdastjóri og stofnandi Saga Story House

5 helgar í Yogavin.

Kennt laugardag og sunnudag frá 8.00 - 16.30

ANATOMIA STOÐKERFISINS
Kennari: Rakel Dögg Sigurgeirsdóttir, nuddari, flotþerapisti, sjúkaþjálfari og yogakennari

Námsefni:

Stoðkerfið, vöðvar og bein
Hreyfifræði líkamans

Rakel Dögg leiðir nemendur í gegnum undraveröld stoðkerfisins með tilliti til asana. Lögð áhersla á anatomiu sem nýtist í yogakennslu. Hún deilir reynslu sinni af að hjálpa fólki að auka hreyfifærni, styrk og liðleika.

Umsögn nemenda um þennan áfanga:

Áhugaverð helgi þar sem farið var yfir mikið efni. Rakel var traustvekjandi sjúkraþjálfari og mjög þægilegt að fá kennslu frá henni. Mikil þekking í tengslum við vöðva og skemmtileg tenging við yogafræðin.

Soffía Elín Sigurðardóttir sálfræðingur og yogakennari

Frábær helgi í alla staði. Einstaklega skemmtilegur kennari sem útskýrði og kenndi á skemmtilegan hátt og náði með framkomu sinni að gera viðfangsefnið svo áhugavert og skemmtilegt. Farið var í anatomiuna á met hraða og alveg ótrúlegt hvað það skilaði sér. Bækurnar sem stuðst var við voru einnig góðar og myndrænar sem gerði námið þessa helgi lifandi. Hér var gott dæmi um hvernig ástríðufullur og skemmtilegur kennari getur komist yfir mikið efni og fengið mann til að njóta allan tímann.

Sólveig Sigurgeirsdóttir kennari og yogakennari

ANATOMIA INNRI LÍFFÆRANNA
Kennari Kolbrún Björnsdóttir grasalæknir og eigandi Jurtaapóteksins

Námsefni:

Innri líffærin með áherlsu á meltingarveginn
Heildræn heilsufræði
Næringafræði

Frætt um innri líffærin með áherslu á meltingarveginn og hvernig meltingin er undirstaða góðrar heilsu og vellíðunar. Kolbrún deilir reynslu sinni af að hjálpa fólki að ná andlegu og líkamlegu jafnvægi með meðvituðu mataræði, hreyfingu og hugrækt.

Umsögn nemenda um þennan áfanga:

Fagmennska og ástriða Kolbrúnar gerði þessa kennsluhelgi svo sannarlega einstaka og eftirminnilega.

Nicole Keller jarðefnafræðingur og yogakennari

KENNSLUFRÆÐI

Kennari Ásta Arnardóttir, yogakennari

Námsefni:

Uppbygging yogatíma / vinyasa
Leiðbeiningar í og úr stöðum
Aðstoð í asana
Siðfræði og traust
Öruggt og verndað umhverfi

Nemendur fá model að uppbyggingu vinyasa tíma sem gefur möguleika á markvissum, fjölbreyttum og skapandi yogatímum. Áfanginn gefur glögga innsýn í siðfræði, samskipti og faglega leiðsögn í yogakennslu. Nemendur læra að aðstoða í stöðum. Lögð er áhersla á marvissa og skapandi nálgun í kennslu.

Umsögn nemenda um þennan áfanga:

Kennari býr yfir miklum styrkleika í kennslufræðum og fléttar á eftirtektarverðan hátt saman fróðleik og fjölbreyttri upplifun sem verður til þess að nemandi upplifir mjög mörg ,,aha!“ móment í náminu. Sú virðing fyrir líkamanum sem höfð er að leiðarljósi er til fyrirmyndar. Kennslufræði og kennsluaðferðir sem ég kann virkilega vel að meta.

Ingibjörg Valgeirsdóttir yogakennari, framkvæmdastjóri og stofnandi Saga Story House

KYRRÐARVAKA *

Yoga og hugleiðsluhelgi í Skálholtsbúðum
Kennari Ásta Arnardóttir yogakennari

Kyrrðarvakan er haldin í þögn sem gefur tækifæri að dýpka iðkun og þekkingu.

NB ! Það er ekki skyldumæting á kyrrðarvöku og hún er ekki innifalin í verði.

ÆFINGAKENNSLA I

Kennari Ásta Arnardóttir yogakennari

Markmið æfingakennslu er að nemendur tileinki sér kennslutækni og fái þjálfun í að byggja upp yogatíma, leiðbeina í og úr stöðum, aðstoða í asana, skapa verndað umhverfi og miðla af sinni þekkingu á jákvæðan og uppbyggilegan hátt. Leikgleði og alúð höfð að leiðarljósi.

ÆFINGAKENNSLA II

Uppskeruhátíð þar sem nemendur kenna 50 mínútna tíma. Einstakt ferli úrvinnslu þar sem allir þættir iðkunar koma saman í fallega heild samsköpunar. Endurgjöf kennara og nemenda. Skipt í 3 hópa og hver nemandi mætir eina helgi með sínum hóp. Velkomið að mæta með hinum.

Umsögn nemenda um þennan áfanga:

Alveg ótrúlega flottur endapunktur á náminu. Hellings lærdómur fór þar fram sama í hvaða hlutverki maður var.

Hrafnhildur Sævarsdóttir yogakennari og íþrótta og sundkennari Sjálandsskóla

Þessi hluti námsins studdi stórkostlega við iðkun og menntun. Krefjandi en mikilvægur hluti og ég gæti ekki verið sáttari í dag. Mér fannst allt smella saman þarna og mjög gott að fá leiðbeiningar um næstu skref. Æfingakennslan var miklu dýpra og merkingarbærara ferli fyrir mig en ég hafði ímyndað mér.

Anna Lóa Ólafsdóttir ráðgjafi hjá VIRK, yogakennari og pistlahöfundur m.a. með Hamingjuhornið

Heimaverkefni

Dagbók þakkir og ásetningur
Heimapróf í anatomiu innri líffæra
Heimaverkefni anatomia stoðkerfis
Ritgerð (1500 – 2000 orð)
Byrjendanámskeið í yoga (hópverkefni 4 í hóp)
Hugleiðing um iðkun (500 – 1000 orð)
Dagleg iðkun yoga og hugleiðslu á meðan á náminu stendur

Útskrift og verð

Útskrift

Réttur Yogavin til að útskrifa yogakennara sem geta sótt um aðild að JKFÍ byggist á því að nemendur hafi uppfyllt eftirfarandi atriði:

Mæting í allar kennslustundir*
Skil á heimaverkefnum
Mæting í 20 yogatíma á námstímanum
Full greiðsla skólagjalda
* ef nemendur forfallast vegna veikinda eða annara óviðráðnlegra aðstæðna er nemendum gefin kostur á því að ljúka heimverkefni eða bæta upp mætingaskyldu ef kostur er. Einnig eru ákveðin fög metin ef nemendur hafa sambærilega menntun og send inn skirteini því til staðfestingar.