Harpa Arnardóttir leikkona mætir til leiks með trúðinn Gjólu sem leiðir Djóga Nidra tíma á sinn einstaka hátt.

Dásamleg trúðasýning þar sem Gjóla fer á kostum og leiðir gesti inn í sannkallað hlátursjóga.

Öll velkomin í “djóka nidra” í Djókavin!

Gjóla kom fyrst fram í Dauðasyndunum í Borgarleikhúsinu 2008. Hinn guðdómlegi gleðileikur Dantes var viðfangsefni trúðanna í þeirri sýningu sem sló rækilega í gegn. Gjóla hefur haldið ljóðasmiðjur fyrir 5 ára börn í samstarfi við Bókasafnið í Kópavogi. Einnig var hún um árabil með listsmiðju fyrir fjölfatlaða á Lyngási.

Harpa Arnardóttir útskrifaðist úr Leiklistarskóla Íslands 1990. Hún hefur starfað sem leikkona og leikstjóri hjá í Borgarleikhúsinu, Þjóðleikhúsinu og hjá sjálfstæðum leikhópunum. Hún lauk MA námi í ritlist við Háskóla Íslands 2014 og frumflutti sitt fyrsta leikrit, Bláklukkur fyrir háttinn, á Listahátíð Reykjavíkur 2019. Verkið var flutt í jurttjaldi á fjórum stöðum í óbyggðum sumarið 2019. Hún hefur sterkar rætur í náttúrunni og hefur tekið þátt í og skipulagt fjölmarga skapandi leiðangra um hálendi Íslands. Hún hefur kennt leiklist og spuna hjá Kramhúsinu, Listaháskóla Íslands og víðar og þróað og kennt fjölmargar listsmiðjur barna og fullorðinna. Árið 2019 lauk Harpa 300 klst. námi í Shamanic Energy Medicine í Four Winds skólanum í Chile. Hún stundar nú nám í höfuðbeina- & spjaldhryggjarmeðferð hjá Upledger á Íslandi. Hún lærði Yoga Nidra hjá Matsayananda 2020 og hefur kennt Yoga Nidra í Yogavin.